بو شرق اونورسيته‌سنڭ او جهانشمول قيمت و أهمّيتنى بر بحرِ عمّاندن بر قطره تقديم ايدر مِثللو ايكى اوچ نقطه اولارق عرض ايدرز:

برنجيسى:

بو دار الفنون هم ايران، هم عربستان، هم مصر و افغانستان، هم پاكستان و توركستان و آناطولينڭ مركزنده بر قلب حكمنده‌در. و هم بر جامع الأزهر، بر مدرسة الزهرادر.

ايكنجيسى:

شيمدى عموم بشرده صلحِ عمومى ايچون يعنى بشرڭ إفساد ايديلمه‌مسى ايچون چاره‌لر آرانييور، پاقتلر قورولويور. و مادام بو حكومتِ إسلاميه مصالحاتِ عموميه و حكومتڭ سلامتى ايچون يوغصلاويايه تا إسپانيايه قدر اونلرى اوقشايه‌رق دوستلق قورمغه چاليشييور. ايشته بونلرڭ چارهِٔ يگانه‌سنڭ بر دليلى اولارق گوسترييورز كه، تأسيس ايديله‌جك شرق دار الفنوننڭ ايلك متشبّثنڭ بر درس كتابى اولان و علومِ مثبته و فنّيه ايله علومِ ايمانيه‌يى باريشديران و بو اوتوز سنه‌دن بَرى بتون فيلسوفلره ميدان اوقويان و رسمى علمايه طوقونديغى و أسكى حكومتله رسمًا مبارزه ايتديگى حالده بتون بونلر طرفندن تقدير و تحسينه مظهر اولان و محكمه‌لرده برائت قزانان رسالهِٔ نورڭ بو وطن و ملّته تأمين ايتديگى آسايش و أمنيتدر كه· إسلام مملكتلرنده، خصوصًا فاسده، مصر و سوريه و ايران گبى يرلرده وقوع بولان داخلى قاريشيقلقلرڭ بو وطنده گورولمه‌مسيدر. ايشته ناصلكه بو وطن و ملّتده رسالهِٔ نور (أمنيت و آسايشڭ إخلالنه سائر مملكتلردن داها زياده أسباب بولونماسنه رغمًا) آسايشى تأمين ايتمه‌سى گوسترييور كه· او طوغو اونورسيته‌سنڭ تأسيسى، بشرى مسالمتِ عموميه‌يه مظهر قيلاجقدر. چونكه شيمدى تخريبات معنوى اولديغى ايچون اوڭا مقابل تعميرجى معنوى بر آتوم بومباسى لازمدر. ايشته بو زمانده تخريباتڭ معنوى اولديغنه و اوڭا قارشى مقابله‌نڭ ده آنجق تعميرجى معنوى آتوم بومباسيله ممكن اولابيله‌جگنه قطعى بر دليل اولارق اونورسيته‌نڭ مبدأ و چكردگى اولان رسالهِٔ نورڭ بو اوتوز سنه ايچريسنده آوروپادن گلن دهشتلى ضلالت و فلسفه و دينسزلك هجوملرينه بر سد تشكيل ايتمه‌سيدر. او معنوى تخريباته قارشى رسالهِٔ نور تعميرجى و معنوى بر آتوم بومباسى اولمش.