يگرمىبش اوتوز سنه‌دن بَرى بتون مانعلره و صيقنتيلره رغمًا بو قدر صبر و متانتڭز و قرآندن قلبِ منوّريڭزه گلن رسالهِٔ نورڭ نشرى جهتنده بو قدر خدمت و مجاهده‌لريڭز، إستقبالڭ نسللرينه و إسلامڭ قهرمان مجاهدلرينه بر نمونهِٔ إقتدا و إمتثال اولويور. قرآن گونشنڭ سونمه‌ين نورلرى و أبدى لمعه‌لرى اولان نور شعاعلريله جهل و ضلالت قراڭلقلرينى إزاله ايده‌رك، ميليونلر قلبلرى، او نورله نورلانديروب، أهلِ ايمانى كنديڭزه منّتدار ايتديڭز. بو وطن و بو ملّت، بو تاريخ و بو طوپراق، سزڭ بو خدمتڭزى، بو فداكارلغڭزى هيچ بر زمان اونوتميه‌جقدر. أبديت عالمنه گوچ أيلديگڭزده دخى، سزڭ بو خدمتڭز بر چكردك اولوب، اوندن فيشقيران بر شجرهِٔ عاليه هر طرفى قاپلايه‌جق و او نور آغاجنڭ أطرافنه طوپلانان بيوك جماعتلر و رسالهِٔ نورڭ يوكسه‌لن أبدى شعاعلرى، او خدمتڭزى إلَى الأبد و داها پارلاق و داها شعشعه‌لى إدامه ايده‌جكلر.

سز، رسالهِٔ نورڭ ترجمانى حيثيتيله و بو ايمان خدمتڭزڭ إسلام اُفقلرنده پارلاماسى جهتيله، بو عصرڭ بر هدايت سرداريسڭز.

قرآنِ كريمڭ اون دردنجى عصرِ محمّديده‌كى عزيز دلاّلى و او مدهش زمانڭ مدهش ظلماتنه قارشى نورِ قرآنله مقابله ايدن بيوك فداكارى و رسالهِٔ نورى يوز بيڭلر نسخه‌لرينى يوز بيڭلر طلبه‌لرينڭ قلملريله هر طرفده نشر ايدوب دينسزلگه و كفرِ مطلقه قارشى بر سدِّ قرآنى تأسيس ايدن محتشم قهرمان سَوْگيلى استاديمز!

عالملره رحمتلر و سعادتلر گتيرن و إنسانلغه سلامت و تسلّيلر بخش ايدن بو مقدّس خدمتڭزله أهلِ ايمانه ظهورينى مژده ويروب إثبات ايتديگڭز و أماره‌لرى گوزوكمگه باشلايان و بتون قطعه‌لره شامل حاكميتِ إسلاميه‌نڭ نورلى و بيوك بايرامنى بتون روحمزله تبريك ايدر، جنابِ حقدن اوزون عمرلريڭزه دعالر ايدر، أللريڭزدن تعظيمله اوپه‌رز.

آنقره اونورسيته‌سى

نور طلبه‌لرى

٭ ٭ ٭