جنابِ حقّه نهايتسز حمد و شكر اولسون كه، حسابسز قصورلرمله برابر بو قرآنى و ايمانى خدمتده إستخدامه لايق گورمشدر. ألبته مبارك و مشفق استاديمڭ دعالرى بركتيله زمرهِٔ نوريه‌نڭ عاجز بر فردى اولمقده دوام و اويله‌جه لواء أحمدى عليه الصلاة والسلام تحتنده طوپلانانلردن اولورم.

تكرار تكرار مبارك أللريڭزى كمالِ تعظيمله تقبيل أيلر، علاقه‌دار قارداشلريمڭ ده سلام، دعا و إحتراملرينى عرض ايدرم. محيطڭزده‌كى مادّةً و معنًا ياقين بتون آرقداشلره عرضِ إحترام أيلرم. أرحم الراحمين اولان ربّمزدن دائمى نيازم· عزيز، محترم و مشفق استادمدن أبديًا راضى اولسون و بتون مقصدينى حاصل أيله‌سين. آمين.

اَلْبَاقِى اَلْحُبُّ فِى اللّٰه

محبِّ مخلصڭز

خلوصى

٭ ٭ ٭

چوق سَوْگيلى، مشفق استادم أفنديم حضرتلرى!

أوّلا:

هم مبارك ليالئِ عشره‌ڭزى، هم قدسى بايرامڭزى روح جانمله تبريك ايدر، عرضِ حرمتلرمله نور نشر ايدن أللريڭزدن اوپر، قصوراتمڭ عفوينى إسترحام ايدرم.

ثانيًا:

بو گناهكار، عادى، عاجز، قصورلى، لياقتسز، مسكين، تنبل طلبه‌ڭزى رسالهِٔ نورڭ حقائقِ قدسيهِٔ ايمانيه و قرآنيه‌سنه و سَوْگيلى استادڭ تربيهِٔ معنويه و مادّيه‌سنه مظهر بيوران جنابِ أرحم الرّاحمينه حدسز شكر ايدييورم.

﴿اَلْحَمْدُ ِللّٰهِ هٰذَا مِنْ فَضْلِ رَبِّى﴾

سَوْگيلى استادم! تربيهِٔ معنويه‌ڭزڭ آثارينى هر وقت بزه إحساس ايدن ربِّ رحيممه نه قدر شكر ايتسه‌م ينه آزدر. تحديثِ نعمت اولمق اوزره شونى ده عرض ايتمك ايسترم كه: خسته‌لغمدن مشتكى دگلم. چونكه ِللّٰه الحمد نورِ عينم و سرورِ روحم و غداءِ قلبم اولان رسالهِٔ نورڭ حقيقتلرينى بِالفعل و بِالتجربه درس آلمامه سبب اولدى.