و ايشته بتون حياتى بِلا إستثنا بو فراغته و بو حقيقته شهادت ايدن بر ذاته، أڭ حقسزلرڭ دخى ياپاميهجقلرى بر إسنادى بو أهلِ وقوف إسملى كيمسهلر ياپمشلر. حتّى "ليلهِٔ قدرده إخطار ايديلن بر مسئلهِٔ مهمّه" دييه رهبردهكى چوق مهمّ بر حقيقته نظر ايتميهرك، بو إخطار كلمهسندن ده شخصى نفوذ تأمين ايتديگنه بر دليل گوسترمشلر. حالبوكه بو إخطار كلمهسى او يوكسك حقيقتلرڭ أهمّيتنه اويله بر شمولى وار كه، آنجق او حقيقتى اوقومق لازمدر. ايشته او پارچه ايكنجى حربِ عمومينڭ صوڭنده نوعِ بشرڭ دهشتلى ظلملرى و تخريباتلرى نتيجهسندهكى دهشتلى مأيوسيتلريله دهشتلى وجدان عذابلرينى و دنيا حياتنڭ بتون بتون فانى و موقّت اولماسى و مدنيت فانتازيهلرينڭ اويوتوجى و آلداتيجى اولديغنڭ عمومه گورونمهسيله، فطرتِ بشريهدهكى يوكسك إستعداداتڭ دهشتلى يارهلانماسنى و قرآنڭ ألماس قلنجى آلتنده غفلت و ضلالتڭ پارچهلانديغنى و بو سببله دنيا حياتنڭ گچيجى و موقّت اولماسندن، بشريت حياتِ باقيهيى آراياجغنى و أبدى حياتى و دائمى سعادتى آنجق قرآنڭ مژده ويرديگنى إثبات ايله پك پارلاق ايضاحدن صوڭره دييور: "ألبته نوعِ بشر، بتون بتون عقلنى غائب ايتمزسه، مادّى ويا معنوى بر قيامت باشلرينه قوپمازسه· إسوهچ، نوروهچ، فينلانديا و إنگلترهنڭ قرآنى قبول ايتمگه چاليشان مشهور خطيبلرى و آمريقانڭ دينِ حقّى آرايان أهمّيتلى جمعيتى گبى روىِ زمينڭ گنيش قطعهلرى و بيوك حكومتلرى قرآنِ معجز البيانى آراياجقلر و حقيقتلرينى آڭلادقدن صوڭره بتون روح و جانلريله صاريلاجقلر. چونكه بو حقيقت نقطهسنده قطعيًا قرآنڭ مِثلى يوقدر و اولاماز و هيچ بر شى بو معجزهِٔ أكبرڭ يرينى طوتاماز."
Risale-i Nur Kütüphanesi