أوت بو مسئله، كوچك بر مسئله دگل· كائنات و حيوانات ايله علاقه‌داردر. بن رسالهِٔ نورڭ بر شاكردى اولمق إعتباريله، كندى حصّه‌مه دوشن بو كار و نتيجه‌يى، بيڭلر آلتون ليرا قدر قزانجم وار قناعت ايدييورم. باشقه يوز بيڭلر رسالهِٔ نور شاكردلرى و تقويهِٔ ايمانه محتاج أهلِ ايمانڭ إستفاده‌لرى بوڭا قياس ايديلسين.

أوت دينڭ، شريعتڭ و قرآنڭ يوزدن زياده طلسملرينى، معمّالرينى حلّ و كشف ايدن و أڭ معنّد دينسزلرى صوصديروب إلزام ايدن و معراج و حشرِ جسمانى گبى صرف عقلدن چوق اوزاق ظن ايديلن قرآن حقيقتلرينى أڭ متمرّد و أڭ معنّد فيلسوفلره و زنديقلره قارشى گونش گبى إثبات ايدن و اونلرڭ بر قسمنى ايمانه گتيرن رسالهِٔ نور أجزالرى، ألبته كُرهِٔ أرض و كُرهِٔ هوائيه‌يى كندى ايله علاقه‌دار ايدر و بو عصرى و إستقبالى كندى ايله مشغول ايده‌جك بر حقيقتِ قرآنيه‌در و أهلِ ايمان ألنده بر ألماس قلنجدر.

٭ ٭ ٭