رسالهِٔ نورڭ ذو الفقار و سائر مجموعه‌لرڭ إنتشارى ايچون بيوك يارديملرده بولونان و مرحوم شهيد حافظ علىنڭ أڭ مكمّل طرزده يازديغى و نور فابريقه‌سنده تام چاليشقان بر آرقداشى و صادق بر وارثى اولان حافظ مصطفىنڭ ألنه أمانت بيراقيلان بتون رسالهِٔ نور أجزالرى اونڭ ألنه گچمه‌سنى تأمين ايدن أحمد فؤادى و أمانتى اوڭا تسليم ايدن قارداشمز حافظ مصطفىيى و صفرانبولى مملكتنى و اوراده‌كى قارداشلريمزى روح و جانمزله تبريك ايدييورز. إن شاء اللّٰه ذو الفقاره ويرديگى هر بر بانقنوطه مقابل بيڭ كار گوره‌جك، بيڭلر خيرلره مدار اولاجق. هم اوڭا، هم قارداشلرندن خطيب إبراهيمه، هم يڭى بر فداكار معلّم اولان مصطفى صونغوره و كوچك بر صلاح الدين اولان رحمىيه و باشده مصطفى عثمان و حفظى اولارق اوراده‌كى بتون قارداشلريمزه سلام ايدرز.

٭ ٭ ٭

محترم، مبارك، معزّز، شفقتلى و فضيلتلى استاديمز أفنديمز حضرتلرينه!

أوّلا:

﴿لِكُلِّ مُصِيبَةٍ اِنَّا ِللّٰهِ وَاِنَّا اِلَيْهِ رَاجِعُونَ﴾

رسالهِٔ نور قهرمانلرندن شهيد مرحوم حافظ على أفندينڭ رفاقتِ معنويه‌سنه بو دفعه واصل اولان حسن فيضى آغابگمزڭ إرتحالى، بزلرى جدًّا متأثّر أيله‌مشدر. باشده سز استاديمز أفنديمز اولدقلرى حالده بتون رسالهِٔ نور طلبه‌لرينه و كنديسنڭ منسوب اولديغى مادّى و معنوى أفرادِ عائله‌سنه و مدرسهِٔ نوريه‌سنه و دڭزلى خلقنه تعزيتلريمى بيلديرر و تأثّرلريڭزه إشتراك أيلرم. و ناچيز معنوى هديه‌لريمى درگاهِ إلٰهيه‌يه تقديم أيلركن، غريقِ رحمتلر إحسان بيورماسنى نيازلرده بولونورم.

﴿كُلُّ نَفْسٍ ذَائِقَةُ الْمَوْتِ﴾

فحواسنجه، بو عالمدن عالمِ أرواحه گوتورديگى،

﴿وَالَّذِينَ اٰمَنُوا وَعَمِلُوا الصَّالِحَاتِ لَنُبَوِّئَنَّهُمْ مِنَ الْجَنَّةِ غُرَفًا تَجْرِى مِنْ تَحْتِهَا الْاَنْهَارُ خَالِدِينَ فِيهَا نِعْمَ اَجْرُ الْعَامِلِينَ﴾

آيتِ سبحانينڭ إشارت بيورديغى أجرِ نعيم، چوق حسن فيضيلر سنبل ويرمسنى ألطافِ إلٰهيه‌دن تضرّع و نياز أيلرم.