بنم طرفمدن او مصيبتزده‌لره دييڭز كه: نصِّ حديثله، بويله مصيبتلرده أهلِ ايمانڭ ضايع اولان ماللرى تام صدقه حكمنده‌در. خصوصًا بو زمانده، يوز صدقه قدر او فانى ماللرى، باقى و داها چوق أبدى ماللره إنقلاب ايدرلر. اونڭ ايچون صبر ايچنده بر جهتده شكر ايتمك گركدر. إن شاء اللّٰه دنياده دخى او كفّارت الذنوب اولان ضايعاتڭ يرينه أرحم الراحمين إحسان ايدر. گچمش اولسون، باشڭز صاغ اولسون، فائده‌سز مراق ايتمه‌يڭز دييڭز.

ثانيًا:

بو چشيد قضالرڭ بر سببى، بشرڭ چركين بر خطاسى بولونماسندن، بو رمضانِ شريفڭ حرمتنى و قيمتنى محافظه ايتمك و نورلرى حمايه ايتمگه، هر يردن زياده نورلرڭ منبعى و مدرسه‌سى اولان إسپارطه بورجليدر و وظيفه‌سيدر. و سفاهتلره قارشى شعائرِ إسلاميه‌يى محافظه ايتمكله مكلّفدر.

٭ ٭ ٭

هم مثلا:

﴿لَوْلَاكَ لَوْلَاكَ لَمَا خَلَقْتُ الْاَفْلَاكَ﴾

بياننده "بو خطاب ظاهرًا حضرتِ پيغمبر عليه الصلاة والسلامه متوجّه ايسه ده، ضمنًا حياته و ذوى الحياته راجعدر." فقره‌سى، تعديله محتاجدر. چونكه كلّى حقيقتِ محمّديه (عصم) هم حياتڭ حياتى، هم كائناتڭ حياتى، هم إسمِ أعظمڭ تجلّئِ أعظمنڭ مظهرى و بتون ذىروحلرڭ نورى و كائناتڭ چكردكِ أصليسى و غايهِٔ خلقتى و ميوهِٔ أكملى اولماسندن، او خطاب طوغريدن طوغرىيه اوڭا باقار. صوڭره حياته و شعوره و عبوديته اونڭ حسابنه نظر ايدر.

هم مثلا: فلسفه‌يه تماس ايدن بعض جمله‌لر، "مرورِ زمانله قابوق باغلامش، صوڭره طوپراغه إنقلاب ايتمش، صوڭره نباتات حصوله گلمش، صوڭره حيوانات وجوده گلمش" گبى تعبيرلر، ايجاد و خلقتِ إلٰهى نقطه‌سنده فلسفيدر كه، رسالهِٔ نورڭ صنعت و ايجادِ إلٰهى جهتنده‌كى بياناتنه مناسب دوشمييور.