هم مهاجر حافظ أحمدى، هم بڭا، هم نورلره علاقه و صداقت نقطه‌سنده نورلرڭ برنجى طلبه‌سى و فداكار بر ناشرى قلبًا حسّ ايتمشدم. حالبوكه قلمله خدمته موفّق اولامادى. چوق دفعه او غيبى حسّمى تخطّر ايدردم. صوڭره بردن هم اوغلى كاظم، هم دامادى بحرى، هم ديگر دامادى بَرْبر محمد اوندن حسّ و اُميد ايتديگم متينانه خدمتى فوق العاده بر علاقه و صداقتله تام تامنه يرينه گتيرمگه، چاليشمغه باشلاديلر. حتّى حفيده‌لرى دخى معصوم شاكردلر ايچنه گيرمشلر. عمومه سلام.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ﴾

عزيز، صدّيق، بختيار، وفاكار، فعّال، ثباتكار قارداشلرم!

أوّلا:

تكرارًا هم سزڭ رجبِ شريفڭزى و ليلهِٔ رغائبڭزى تبريك، هم صفرانبولىلى قارداشلريمزڭ تبريكلرينه مقابلةً شهورِ ثلاثه‌لرينى و درت ليالئِ مباركه‌لرينى و نورلرله غايت جدّى علاقه‌لرينى تبريك ايدرز. و اورانڭ شاكردلرى نامنه يازيلان تبريكنامه مكتوبنده بنم پك چوق قصورلى شخصمه ويردكلرى عنوانلرى و ثنالرى، خليل إبراهيمڭ بعض مكتوبلرى گبى، تعديل ايله "رسالهِٔ نور"ه چويروب لاحقه‌يه گيرمسنى ايستدم. فقط شخصم پك صريح بر طرزده موضوع ياپيلديغى ايچون ياقيشديرامدم، شيمديلك گرى قالدى.