استادِ معزّزم! قرآنِ عظيم الشانڭ نه درجه‌لرده زنگين بر خزينهِٔ رحمتِ إلٰهيه بولونديغى وارستهِٔ عرض اولوب، او خزينهِٔ قدسيه‌نڭ محتوى بولونديغى أنواع درلو ألماس و پيرلانطه‌لرى چيقارتمق و بِالوسيله بزم گبى محتاج اولانلره ده ويرديرمك خصوصنده، نورلر كلّياتنڭ أكثريسنده تام بر محرّكلك وظيفه‌سنى درعهده ايدن استادِ ثانى خلوصى بك أفنديمى، تشبيه و تعبيرى جائز ايسه، ساعتجيلرده بولونان ييلديزوارى سكز اون آغزلى ساعت آناختارلرينه بڭزه‌تييورم كه· او متعدّد آغزلى آناختار، عالمده موجود هر ساعتى تحريك ايدر، ايشله‌دير. مُومٰى إليه بك أفنديم ده، عينًا او حالده اولوب، أمثالى گورولمه‌مش و طويولمامش بر چوق مسائلِ مهمّهِٔ حقيقيه‌يى حضرتِ قرآن و دلاّلِ قرآندن ايسته‌يور.

شو عصرده خزينهِٔ خاصّهِٔ معنويه‌نڭ خزينه‌دارِ بىنظيرى ده، او قيمتدار سائلنه أڭ قيمتدار و روحه تام بر غدابخش موائدِ معنويهِٔ قرآنيه ايله إعزاز و إكرام ايدركن او حلقه‌يه لايق و مستحق اولماديغم حالده، فقير ده غداىِ روحانيمى آرامسز آلنجه· او موائدى إحسان ايدنه ده، گتيرنه ده، ايسته‌ينه ده حدسز مديونِ شكران قالييورم. بو دفعه‌كى آلديغم لطفنامهِٔ أكرميلرنده، گوجنمه‌سنى حاضر فرض ايده‌رك مكتوبله مخابره ايتمييورم، بيوريلييور. بو خصوصده قلب و روحمه "نه ديرسڭز؟" ديدم. "اَسْتَغْفِرُ اللّٰه، صدهزار اَسْتَغْفِرُ اللّٰه. بز ئولمشدك، لَهُ الْحَمْدُ بزه تازه حيات بخش ايديلدى. گوجنمگه، هيچ بر جهتله حقّمز يوق. وظيفه‌مز اولان دعايه دوام و تشكّر بورچلىيز." جوابِ حق گويانه‌سنى روحمدن آلدم.

حافظ صبرى

٭ ٭ ٭