فقط سَوْگيلى استادم، زمان تقرّب ايتمش اولمالى كه· بر طرفدن ملحدلرڭ تجاوزلرى زياده‌لشدكجه، ديگر طرفدن محترم استاديمزڭ، قرآنڭ فيضى ايله نائل اولديغى حقيقت درياسندن كوكره‌يوب گلن گيزلى حقائقى إظهار ايتمه‌سى بزم سَوينجمزى آرتيرمقده‌در. مادام چيچكلرى گورمك ايچون بهارى بكله‌مك ضرورتى واردر، بز ده اوڭا شدّتله و صبرسزلقله إنتظار ايتمكده‌يز.

خسرو

٭ ٭ ٭

(خسروڭ بر فقره‌سيدر)

سَوْگيلى، محترم استادم، قيمتدار استادم!

بكر آغا ايله گوندرديگڭز مكتوبدن طويديغم سرورى تعريف ايتمك، بنم گبى عاجز بر طلبه‌نڭ نه لسانى و نه ده قلمنڭ حدّى دگلدر. سَوينجمدن مكتوبڭزى تقبيل ايدييور· روحم سزڭله ياشاديغى حالده، جسمًا اوزاق بولونديغمزدن آغلايوردم. زمان اولويور كه، گوزلرمدن دوكولن ياشلرى، يازى يازمق وياخود رساله‌لرى اوقومقله تسكين ايده‌بيلييورم. زمان اولويور قلبم متماديًا آغلايور، آه سَوْگيلى استادم سزدن پك بيوك إسترحامم بودر كه: بنى عفو ايديڭز. ايكى اوچ سنه‌دن بَرى دنيايى سومز اولديغم حالده قورتولاماديغمدن چوق متأثّرم. ايصسز صحرالر، صوسز چوللر، روحمڭ برر مسكنى اولويور. خيالاً اورالرده طولاشييورم. گويا بر شى آرايورم.

أوت، بر شى آرايورم. هيهات آراديغم هم چوق ياقين، هم چوق اوزاق گورونويور. بيلمييورم داها نه قدر زمان بو حال ايچريسنده چيرپينه‌جغم. أوت، ينه پك چوق متشكّرم. ناصل تشكّرم حدسز اولماسين؟ هنوز بر سنه اولدى· ايكى گيجه بربرى اوستنه گورديگم ايكى رؤياىِ صادقه‌ده، تمللرى آتيلمقده اولان بيوك بر گل ياغى فابريقه‌سنڭ كاتبلگنه تعيين ايديلمش و ايشه مباشرت ايتمشدم. بو رؤيا تاريخندن ايكى آى صوڭره رساله‌لرى يازمغه باشلادم. و بِالخاصّه يگرمى سكزنجى مكتوبڭ يدنجى و سكزنجى مسئله‌لرنده، خدمتمزڭ مقبوليتى و رضاءِ إلٰهى داخلنده اولديغى پك آچيق بر لسانله يازيلماسى، عاجز طلبه‌ڭزى ده دلشاد ايتمش بولونويور. سَوْگيلى استادم، اللّٰه سزدن أبدًا راضى اولسون.