سنى اونوتميان خسته قارداشڭز
سعيد النورسى
برادرزادهم نهادڭ گوزلرندن اوپرم. او ده باباسى ايله برابر دائما دعامدهدر.
٭ ٭ ٭
﴿بِاسْمِهِ سُبْحَانَهُ ٭ وَاِنْ مِنْ شَيْءٍ اِلَّا يُسَبِّحُ بِحَمْدِهِ﴾
﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ اَبَدًا دَائِمًا﴾
عزيز، صدّيق قارداشلرم!
أوّلا:
عمومڭزك حسابنه طاهرىيى گوردم و كندى حسابمزه ده، عمومڭزه تام بر سعيد و جانلى بر مكتوب اولارق گوندردم. و صنديقلىدن أدهم خواجه ايله مصطفى خواجه بوگون گلديلر، نورلى وظيفهلرينه گيتديلر.
ثانيًا:
خلوصى بك قارداشمز ذو الفقار و سراج النورى و صوڭره سكّهِٔ غيبيهيى ايستهيور. نور سانترالى صبرى مخابره ايتسين، گوندرمگه چاليشسين.
ثالثًا:
رسالهِٔ نور كندى كندينه، هم داخلده، هم خارجده إنتشار ايدوب فتوحات ياپييور. أڭ معنّد دينسزلرى ده تسليمه مجبور ايتديگنى خبرلر آلييورز. يالڭز شيمديلك، بر درجه إحتياطڭ لزومى اولديغنه، خصوصًا بشنجى شعاع ايچنده بولونان سراج النور، لايق اولميان أللره ويريلمهمليدر.
إمامِ على (رض) رسالهِٔ النوره، سراج النور نامى ويرمهسى و "سِرًّا تَنَوَّرَتْ" ديمهسيله إشارت ايدييور كه، سراج النور پرده آلتنده داها زياده تنوير ايدهجك، دييه بر إشارتِ غيبيه تلقّى ايدييورز. عمومڭزه سلام ايدرز.
Yükleniyor...