مقصدم، اوڭا او رساله‌يى يازديرمق، اونى خاص طلبه‌لر دائره‌سنه إدخال ايتمكدى. يوقسه اوڭا او زحمتى ويرمزدم. ما شاء اللّٰه، خاتمِ معجزاتِ أحمديه‌يى (عصم) چوق گوزل ترسيم ايتمشسڭز. سوزلر ايله علاقه‌دارلر ايچنده، بو خاتمه تام قناعتى اولانلرڭ إسملرينى بڭا يازسينلر، اونلرى ايكنجى دائره‌ده يازاجغز. تا او نوره حصّه‌دار اولسونلر. شكره دائر نسخه‌ڭز قله‌اوڭلى مصطفى بر آدمه ويروب، او ده محافظه ايده‌مه‌مش. ياغمور بر پارچه بوزديغى ايچون محجوب اولارق، سڭا گوندرميوب بڭا گوندردى. بنم ده گوزل يازيلمش بر نسخه‌م وار، سڭا گوندرييورم. اوڭا گوره يڭى بر نسخه كنديڭزه يازارسڭز. سن بڭا شكره دائر يازديغڭ مبارك نسخه‌يى، بر آى أوّل آتابك طرفنه گوندرمشدم. كيم آلديغنى بيلمييورم، أليمه گچمه‌دى. هم سزه يگرمى سكزنجى مكتوبڭ يدنجى مسئله‌سنڭ خاتمه‌سنى گوندرييورم. او خاتمه، خاتمِ إعجازه گلن تنقيداتى ردّ ايدييور و پارلاق بر مُهرِ تصديق اولديغنى گوسترييور. او خاتملرڭ بر نسخه‌سنى سڭا گوندردك. اوراده خاتمى گورن و قبول ايدن و سوزلرله علاقه‌دار اولان ذاتلردن مناسب گوردكلريڭى، بوش قالان گوزلره قيد ايده‌بيليرسڭ.

اَلْبَاقِى هُوَ الْبَاقِى

ميرزا زاده

سعيد نورسى

٭ ٭ ٭

Yükleniyor...