اويله ايسه سائر نوعلرڭ دخى، رساله‌لرڭ نوعلرينه إشارت ايدر دييه، دقّت ايتدم كه· يدى نوع خرما گوندريلمش. بر پارچه‌سى بيوكجه، اوتوز اوچ دانه قدر. فسبحان اللّٰه ديدم، يدى نوعى گوندرمكده نه معنا وار. بردن قلبمه گلدى كه: ايمانِ باللّٰهه دائر يدى نوع ايله عين حقيقت يازيلمش، وانه گوندريلمش. دقّت ايتدم، أوت موضوع وحدانيتِ إلٰهيه اولديغى حالده· يگرمنجى مكتوب ايله صورتى كوچك، معناسى پك بيوك ذيليله و يگرمى ايكنجى سوز هر برى برر رساله، برنجى مقام، ايكنجى مقامى و اوتوز ايكنجى سوز اوچنجى موقفى ايله أوّلكى ايكى موقف هر برى برر رساله حكمنده و اوتوز اوچنجى مكتوب، اوتوز اوچ پنجره ايله يدى رساله‌در. او ده عينًا يدى نوع أنوارِ معرفت اللّٰهدن بر شمسِ حقيقتڭ ضياسنده‌كى ألوانِ سبعه گبى بر ماهيت گوسترديگندن، مدينهِٔ منوّره‌نڭ هديه‌سى ايچنده حقيقتِ خرمادن يدى نوع نوح بگڭ ألنه ويريلوب بورايه قدر گوندريلمه‌سى، او يدى نوره توافقله، بر مقبوليت إشارتى ويرييور ديدك، اللّٰهه شكر ايتدك.

هم او نوعدن بريسى اوتوز اوچ دانه اولماسى، او رساله‌لرڭ بريسى اوتوز اوچ پنجره اولماسى و هديه ايچنده‌كى تسبيح اوچ دفعه اوتوز اوچ اولماسى، اوتوز اوچنجى سوزڭ اوتوز اوچنجى مكتوبندن اوتوز اوچ پنجره‌سنه موافقتى· نوحى إختيارسز، صِرف بر واسطهِٔ ظاهرى اولارق بزه گوستردى. نوحه دگل، بلكه روضهِٔ مطهّره‌يه قارشى منّتدارانه، متشكّرانه باقدق.

صوڭره او مبارك ماءِ زمزم، بيوكجه بر شيشه و پارلاق نورانى بر صورتده ايچندن چيقماسى. ديدك كه: مادام او لوحهِٔ مبارك معجزاتِ أحمديه‌يه، او يدى نوع خرما معرفت اللّٰهه و رسائلِ توحيده إشارت وار. ألبته بو ماءِ زمزم دخى، آبِ حياتڭ ماءِ زمزمه‌سنى كائناته طاغيدان قرآنِ مبينڭ منبعى و برنجى محلِّ نزولى بئرِ زمزمه جوارى اولديغندن يگرمى بشنجى سوز اولان إعجازِ قرآنه إشارت واردر. و علامتِ مقبوليت اولارق تلقّى ايدييورز.