چوق شكر سَوْگيلى استاديمزڭ سايه‌سنده و توجّه و دعاسيله بو نورلردن متنوّر و متنعّم اولويورز. هله غوثِ أعظم شيخ گيلانى حضرتلرينڭ كرامات و إخباراتِ غيبيه‌سنى همشيره‌ڭز او قدر لذّت و محبّتله ديڭله‌يور كه· اوچ سنه أوّليسى خسته‌لغه طوتولديغى وقت، او حالنده و قسمًا عقلى باشنده اولماديغى زمانلر باغچه‌ده آغاجلرڭ داللرينى طوتوب، "يا عبد القادرِ گيلانى! يا وَيس القرانى، مدد!" دييه باغيروب صاللانييوردى. بو دفعه كرامات و إخباراتِ غيبيه‌سنى مفصّل صورتده گورمگه و ديڭله‌مگه موفّق اولدى. بو رسالهِٔ شريفه، فقيره ده زياده‌سيله تأثير ايتدى، سُرور و گوزياشلرينى آقيتدى و آقيتمقده سعى و غيرت ايتدى. محمدت و شوقمى آرتيردى. شكريمى ناصل ايفا ايده‌جگمى بيله‌مييورم. خالقِ لم يزل حضرتلرينه قارشى وظيفهِٔ عبوديتم نقصان، ايكى جهان سَرْورى سيّد المرسلين فخرِ عالم (صلّى اللّٰه تعالى عليه وسلّم) أفنديمزه قارشى اُمّتلك وظيفه‌سنده قصور و نقصانم زياده و خدمتِ قرآنيه‌يه قارشى بِحقٍّ سعى و غيرت و چاليشمقده قصور و نقصانم چوق اولمقله برابر، فقيرى سز استادمله برابر بولونديروب، خادمِ قرآن قارداشلرله برلشديروب، خدمتِ قرآنيه‌دن (وَلَوْ كه بر بحرِ عمّاندن بر قطره اولسون) فقيره حصّه ويريلسه، كنديمى مسعود و بختيار عدّ ايدرم. حمد و ثنا و شكريمه حدّ و پايان گوره‌مم. بتون اوقوديغم آرقداش و قارداشلرڭ هپسى هپ تقدير و تحسين و تصديق ايدييورلر و قناعتِ كامله‌ده بولونويورلر. خدمتِ قرآنه شوق و غيرتلرى تزايد ايدييور و بو قافله‌ده و بو دائره‌ده‌كيلره غبطه ايدييورلر. جنابِ خالق اُمّتِ محمّدڭ قلبلرينه إلهام ويرسين، روحلرينى نورلانديرسين، سعادتِ داريْن إحسان بيورسون.

قارداشڭز، فقير و محتاج

عاصم

٭ ٭ ٭