قارداشلرم· بو زمانده ضلالت و غفلته قارشى پك چوق معنوى قوّته محتاجز. مع التأسّف بن شخصم إعتباريله چوق ضعيف و مفلسم. خارقه كراماتم يوق كه، بو حقائقى اونڭله إثبات ايده‌يم و قدسى بر همّتم يوق كه، اونڭله قلوبى جلب ايده‌يم. علوى بر دهام يوق كه، اونڭله عقولى تسخير ايده‌يم. بلكه قرآنِ حكيمڭ درگاهنده، بر ديلنجى خادم حكمنده‌يم. بو معنّد أهلِ ضلالتڭ عنادينى قيرمق و إنصافه گتيرمك ايچون، قرآنِ حكيمڭ أسرارندن بعضًا إستمداد ايدرم. كراماتِ قرآنيه اولارق، توافقاتده بر إكرامِ إلٰهى حسّ ايتدم، ايكى ألمله صاريلدم.

أوت قرآندن ترشّح ايدن إشارات الإعجاز و رسالهِٔ حشرده قطعى بر إشارت حسّ ايتدم. أمثاللرى بولونسون، بولونماسين بنجه بر كرامتِ قرآنيه‌در. إشارات الإعجازڭ بر صحيفه‌سنه دقّت ايتدك· سطرلرڭ باشنده بتون حروفات ايكيشر ايكيشر اولوب، خارقه بر إنتظام ايله حروفاتڭ وضع ايديلديگنى گوردك. اوننجى سوزده مدارِ توافق ٣،٤،٥،٦ رقملرى، هر بريسى ٣١ ده إتّفاقلرى.. او ٣١ ڭ ده، آلتنجى و سكزنجى، محرم دردنجى رمزلرده مهمّ بر أسرار آناختارى اولديغنى گوردك. بونده شبهه‌مز قالمادى كه، كاغد اوزرنده دائما قالاجق بر كرامتِ قرآنيه‌در، بر إكرامِ إلٰهيدر و طوغريدن طوغرىيه، رساله‌نڭ و ايمانِ حشرڭ تصديقنه بر إمضا تلقّى ايتدك. هواده اوچمق، صو اوزرنده يورومگه بڭزه‌مييور. اونلر موقّت، هم شخصڭ كمالنه و إختيارينه، بلكه إستدراجه ويريله‌بيلير. طوغريدن طوغرىيه حقيقته (خصوصًا بو زمانده) خدمت ايده‌مييور.

هر نه ايسه، بر كوچك مسئله مناسبتيله چوق قونوشدم و چوق ده إسراف ايتدم. أحبابله فضله قونوشمق مرغوب اولديغندن، إن شاء اللّٰه بو إسراف عفو اولور.

قارداشڭز

سعيد النورسى

٭ ٭ ٭