ايشته گرك سوزلر و مكتوبات و گركسه رمزلرڭ أڭ خارقه وصفى، ظنّ ايدرسه‌م بو اينجه نقطه‌ده اولسه گركدر. آثارِ سائره‌يى بر دفعه اوقوينجه، ايكنجى بر دفعه اوقومغه او قدر هوس اويانمييور. قرآنِ حكيمڭ أنوارينى نه قدر اوقورسه‌م اوقويه‌يم، دفعِ جوع ايده‌مييورم. بِالخاصّه رمزلر، فقيرى چوق تسخير و حيرته مستغرق قيلدى. و اونلرى درحال يازييورم.

رأفت

٭ ٭ ٭

(أحمد خسروڭ فقره‌سيدر)

بزى طريقِ حقده طولاشديران، معنوى ياره‌لريمزى تداوى ايدن، حقيقت اوغرنده‌كى دوشونجه‌لريمزه بر قات داها متانت ويرن، بوگونڭ شيطانكارانه تهديداتنه رغمًا جسارتمزى تقويه ايدن و هر خصوصده روح و قلبلريمزى ايمان و حقيقت نوريله نورلانديران و سعيمزده تشجيع ايدن و قرآنِ حكيمڭ ايكى آيتنى إحتوا ايدن اوتوز برنجى مكتوبڭ برنجى و ايكنجى لمعه‌لرينى و يگرمى طوقوزنجى مكتوبڭ سكزنجى قسمندن ايكنجى رمزينه عائد مهمّ بر إعجازى ده آلدق، اوقودق. آلديغمز معنوى فيضى، بنم گبى يوقسول بر طلبه‌ڭزڭ قلب و قلمنڭ حدّى دگلدر كه تعريف ايتسين.

قيمتدار استادم! ناصل او خالقِ ذو الجلاله نهايتسز بر منّتدارلقده بولونميه‌لم كه· عزيز استاديمزى واسطه قيلارق أڭ بيوك نعمتلرينى، پك زياده محتاج اولديغمز بر وقتده ويرييور، بزى تسلّى ايدييور. هم ممنون ايدييور، هم إستقبالڭ نورلى يوزينى گوستره‌رك بزى او نوره قوشديرييور. بر طرفدن قارداشلريمزى چوغالتييور، محبّتلريمزى تكثير ايدييور. مادّى و معنوى قوّتلريمزى تقويه ايدييور. ديگر طرفدن سعادت خزينه‌لرينڭ آناختارلرينى أللريمزه ويرييور.

أى عزيز استادم! اللّٰه سزدن أبدًا راضى اولسون.

أحمد خسرو

٭ ٭ ٭