استادم، بر شى داها وار كه، أمرِ استادانه‌لرينه إنتظارده‌يم. او ده شودر: جنابِ حق إحسان ايدرسه، دائره‌ڭزڭ شاكردينى (حافظ ياشار) بو قيشده بهاره سبب اولوب، متنوّع چيچكلرى آچماسنه نيسان ياغمورى مِثللو، وجوديڭز او چيچكلر آراسنده، بر گُلِ محمّدى (عصم) يتيشديرمكده إن شاء اللّٰه وسيله اولاجغڭزه شبهه يوقدر. مبارك دائره‌نڭ مبارك طلبه‌سنه، مبارك جمعه گيجه‌سنده ختمنڭ دعاسيله، حفظنڭ إبتدا دعاسنى و فقيرِ پرقصورڭ عفو دعاسنى، بتون حاسّه و طويغولرمله، حرمتله أل و أتكلريڭزدن اوپر و قصورلريمڭ عفوينى نياز ايدرم، أفنديم حضرتلرى.

حافظ على

٭ ٭ ٭

(خسروڭ فقره‌سيدر)

سَوْگيلى استادم!

أوّلكى هفته إرسال بيورديغڭز، "بر سرِّ اِنَّا اَعْطَيْنَا" سرلوحه‌سنى طاشييان رساله‌ڭزى آلدق. أساسًا هيچ بر هفته گچمييور، سرورلريمزى تزييد ايدن، يڭى و هم غايت درجه‌ده شيرين بر رساله ألمزه گلمه‌مش بولونسون. ايشته، ايكى هفته‌در بو قيمتدار رساله‌يى اوقويور و ألمزدن بيراقمييورز.

أوت بو رساله، جنابِ حقّڭ إستقبالده بو أمّته وعد ايتديگى گونشڭ طلوعنه إنتظاريمزى تشديد ايتمكله قالماديغى گبى، بر طرفدن ايچنده‌كى حقيقته بزى مفتون ايدييور. و ديگر طرفدن، عجبا فضاسى ظلمت بلوطلريله طولو اولان بو عالمڭ، او گونش نره‌سندن و نه صورتله طوغه‌جق و نه شكلده بو ظلمت و آفت صاچان بلوطلرى طاغيده‌جق دييه تخيّل ايدركن· ايكنجى فيّاض، بر ديگر ذيل، او گونشڭ وقتنى تعيين ايتمكله بزى پك بيوك بر بارِ ثقيلدن قورتارمش و سنه‌لردن بَرى آلمق ايستديگمز حالده آلاماديغمز درين بر نَفَسى ويرمش و بزى دلشاد أيله‌مشدر.