آه سَوْگيلى استادم، لسان و قلمم مساعد اولسه، هر بر رساله ايچون لايق اولدقلرى شكلده مدحيه‌لر ياپوب تقديم ايتسه‌م. هيهات، هر شيده اولديغى گبى، بو خصوصده ده بن فقيرم.

أوت سَوْگيلى استادم! سَوينجمزى آرتيران بر مسئله داها وار. او ده "كنز العرش دعاسنڭ فيضندن گلن بر نكتهِٔ قرآنيه" نامى آلتنده نشر ايديلن ايكى صحيفه‌لك حروفِ هجائيهِٔ قرآنيه‌نڭ بو قسمه علاوه‌سى و بو قسمڭ ده، يازمقده اولديغمز توافقلى و حاشيه‌لى قرآنِ كريمڭ باش طرفنه، عمومڭ إستفاده و إستفاضه‌لرينڭ قولايلقله تأميننه بناءً درج ايديلمسى حقّنده‌كى تنسيبِ فاضلانه‌لريدر. بو تنسيب بزجه ده پك چوق مصيب گورولمكله، فقير طلبه‌ڭزڭ نظرينى ماضيدن حاله، حالدن ده إستقباله چويرييور. و إستقبالده‌كى پارلايان نورلرى گوسترمكله، نهايتسز سرورلره مستغرق قيلييورسڭز.

أحمد خسرو

٭ ٭ ٭

(رأفتڭ فقره‌سيدر)

﴿بِاسْمِهِ ٭ وَاِنْ مِنْ شَيْءٍ اِلَّا يُسَبِّحُ بِحَمْدِهِ﴾

﴿اَلسَّلَامُ عَلَيْكُمْ وَ رَحْمَةُ اللّٰهِ وَ بَرَكَاتُهُ﴾

محترم و چوق قيمتلى استادم أفنديم!

يگرمى طوقوزنجى مكتوبڭ سكزنجى قسمنڭ رمزينى دقّتله اوقودم. إحتوا ايتديگى خارقه‌نما رموزات و او رموزاتڭ إفاده ايتديگى يوكسك حقائق، فقيره عظيم إستفاده‌لر تأمين ايتدى. و بنى درين درين تفكّره و تأمّله سَوق أيلدى. چوجقلغمدن بَرى حقائقِ دينيه‌يه چوق مراق ايدر و هر فرصتدن إستفاده ايده‌رك تدقيقات و تتبّعاتده بولونوردم. نه يازيق كه، أملمه موفّق اولامازدم. بو سببدن يأس و نوميدىيه دوچار اولوردم. نامتناهى شكرلر اولسون اول خلاّقِ عظيمه كه، ذاتِ عاليهِٔ فاضلانه‌لرى گبى، هر عصرده أمثالنه أندر تصادف اولونان بر داهئِ أعظمه بزلرى ملاقى قيلدى ده، اوتوز سنه‌دن بَرى روحمڭ چوق بيوك إشتياق و تحسّرله بكله‌ديگى بر استادِ محترمه نائل أيلدى.

﴿اَلْحَمْدُ ِللّٰهِ ثُمَّ اَلْحَمْدُ ِللّٰهِ هٰذَا مِنْ فَضْلِ رَبِّى﴾