أوت او ذات داها حالِ صباوتده ايكن و هيچ تحصيل ياپمه‌دن ظواهرى قورتارمق اوزره اوچ آيلق بر تحصيل مدّتى ايچنده علومِ أوّلين و آخرينه و لدنّيات و حقائقِ أشيايه و أسرارِ كائناته و حكمتِ إلٰهيه‌يه وارث قيلنمشدر كه، شيمدىيه قدر بويله مظهريتِ عليايه كيمسه نائل اولمامشدر. بو خارقهِٔ علميه‌نڭ أشى أصلا مسبوق دگلدر. هيچ شبهه ايديله‌مز كه· ترجمانِ نور، بو حاليله باشدن باشه عفّتِ مجسّمه و شجاعتِ خارقه و إستغناىِ مطلق تشكيل ايدن خارق العاده متانتِ أخلاقيه‌سى ايله بِالذّات بر معجزهِٔ فطرتدر، تجسّم ايتمش بر عنايتدر و بر موهبهٔ مطلقه‌در.

او ذاتِ ذىخوارق داها حدِّ بلوغه ايرمه‌دن بر علاّمهِٔ بىعديل حالنده بتون جهانِ علمه ميدان اوقومش، مناظره ايتديگى أربابِ علومى إلزام و إسكات ايتمش، هر نره‌ده اولورسه اولسون واقع اولان بتون سؤاللره مطلق بر إصابتله و أصلا تردّد ايتمه‌دن جواب ويرمش، اون درت ياشندن إعتبارًا استادلق پايه‌سنى طاشيمش و متماديًا أطرافنه فيضِ علم و نورِ حكمت صاچمش، ايضاحلرنده‌كى اينجه‌لك و درينلك و بيانلرنده‌كى علويت و متانت و توجيهلرنده‌كى درين فراست و بصيرت و نورِ حكمت، أربابِ عرفانى شاشيرتمش و حقّيله "بديع الزمان" عنوانِ جليلنى بخش ايتديرمشدر. مزاياىِ عاليه و فضائلِ علميه‌سيله ده دينِ محمّدينڭ نشرنده و إثباتنده بر كمالِ تام حالنده رونما اولمش اولان بويله بر ذات ألبته سيّد الأنبياء حضرتلرينڭ أڭ يوكسك إلتفاتنه مظهر و أڭ عالى حمايه و همّتنه نائلدر. و شبهه‌سز او نبىِّ أقدسڭ أمر و فرمانيله يوروين و تصرّفيله حركت ايدن و اونڭ أنوار و حقائقنه وارث و معكس اولان بر ذاتِ كريم الصفاتدر.

أنوارِ محمّديه‌يى و معارفِ أحمديه‌يى و فيوضاتِ شمعِ إلٰهىيى أڭ مشعشع بر شكلده پارلاتماسى و قرآنى و حديثى اولان إشاراتِ رياضيه‌نڭ كنديسنده منتهى اولماسى و خطاباتِ نبويه‌يى إفاده ايدن آياتِ جليله‌نڭ رياضى بيانلرينڭ كندى اوزرنده طوپلانماسى دلالتلريله، او ذات خدمتِ ايمانيه نقطه‌سنده رسالتڭ بر مرآتِ مجلاّسى و شجرهِٔ رسالتڭ بر صوڭ ميوهِٔ منوّرى و لسانِ رسالتڭ إرثيت نقطه‌سنده صوڭ دهانِ حقيقتى و شمعِ إلٰهينڭ خدمتِ ايمانيه جهتنده بر صوڭ حاملِ ذىسعادتى اولديغنه شبهه يوقدر.