يگرمى آلتنجى سوز

قدر رساله‌سى

﴿بِسْمِ اللّٰهِ الرَّحْمٰنِ الرَّحِيمِ﴾

﴿وَاِنْ مِنْ شَيْءٍ اِلَّا عِنْدَنَا خَزَائِنُهُ وَمَا نُنَزِّلُهُ اِلَّا بِقَدَرٍ مَعْلُومٍ﴾

﴿٭ وَ كُلَّ شَيْءٍ اَحْصَيْنَاهُ فِى اِمَامٍ مُبِينٍ ٭﴾

(قدر ايله جزءِ إختيارى، ايكى مسئلهِٔ مهمّه‌در. اوڭا دائر درت مبحث ايچنده بر قاچ سرلرينى آچمغه چاليشه‌جغز.)

برنجى مبحث:

قدر و جزءِ إختيارى، إسلاميتڭ و ايمانڭ نهايت حدودينى گوسترن، حالى و وجدانى بر ايمانڭ جزءلرندندر. يوقسه علمى و نظرى دگللردر. يعنى مؤمن هر شيئى، حتّى فعلنى، نفسنى جنابِ حقّه ويره ويره، تا نهايتده تكليف و مسئوليتدن قورتولمامق ايچون "جزءِ إختيارى" اوڭنه چيقييور. اوڭا "مسئول و مكلّفسڭ" دير. صوڭره، اوندن صدور ايدن اييلكلر و كمالات ايله مغرور اولمامق ايچون، "قدر" قارشيسنه گلييور. دير: "حدّيڭى بيل، ياپان سن دگلسڭ."