بو مأمورينِ ربّانيه، فعلياتلريله و عمللريله ده مأموريتلرينڭ مصدّقى اولورلر. صلابتِ ايمانيه‌لرينڭ و إخلاصلرينڭ آيينه‌دارلغنى بِالذّات ايفا ايدرلر. مرتبهِٔ ايمانلرينى فعلاً إظهار ايدرلر. و أخلاقِ محمّديه‌نڭ (عصم) تام عاملى و مشوارِ أحمديه‌نڭ (عصم) و حليهِٔ نبويه‌نڭ حقيقى لابسى اولدقلرينى گوستررلر. خلاصه: عمل و أخلاق باقيمندن و سنّتِ نبويه‌يه إتّباع و تمسّك جهتندن اُمّتِ محمّده تام بر حسنِ مثال اولورلر و نمونهِٔ إقتدا تشكيل ايدرلر. بونلرڭ كتاب اللّٰهڭ تفسيرى و أحكامِ دينيه‌نڭ ايضاحى و زمانڭ فهمنه و مرتبهِٔ علمنه گوره طرزِ توجيهى صددنده يازدقلرى أثرلر، كندى تلقاءِ نفسلرينڭ و قريحهِٔ علويه‌لرينڭ محصولى دگلدر، كندى ذكا و عرفانلرينڭ نتيجه‌سى دگلدر. بونلر، طوغريدن طوغرىيه منبعِ وحى اولان ذاتِ پاكِ رسالتڭ معنوى إلهام و تلقيناتيدر. جلجلوتيه و مثنوئِ شريف و فتوح الغيب و أمثالى آثار هپ بو نوعدندر. بو آثارِ قدسيه‌يه او ذواتِ عاليشان آنجق ترجمان حكمنده‌درلر. بو ذواتِ مقدّسه‌نڭ، او آثارِ بَرْگُزيِده‌نڭ تنظيمنده و طرزِ بياننده بر حصّه‌لرى واردر· يعنى بو ذواتِ قدسيه، او معنانڭ مظهرى، مرآتى و معكسى حكمنده‌درلر.

رسالهٔ نور و ترجماننه گلنجه:

بو أثرِ عالىشانده شيمدىيه قدر أمثالنه راستلانمامش بر فيضِ علوى و بر كمالِ نامتناهى موجود اولديغندن و هيچ بر أثرڭ نائل اولماديغى بر شكلده مشعلهِٔ إلٰهيه و شمسِ هدايت و نيّرِ سعادت اولان حضرتِ قرآنڭ فيوضاتنه وارث اولديغى مشهود اولديغندن· اونڭ أساسى نورِ محضِ قرآن اولديغى و أولياء اللّٰهڭ آثارندن زياده فيضِ أنوارِ محمّدىيى حامل بولونديغى و ذاتِ پاكِ رسالتڭ اونده‌كى حصّه و علاقه‌سى و تصرّفِ قدسيسى أولياء اللّٰهڭ آثارندن زياده اولديغى و اونڭ مظهرى و ترجمانى اولان معنوى ذاتڭ مظهريتى و كمالاتى ايسه او نسبتده عالى و أمثالسز اولديغى گونش گبى آشكار بر حقيقتدر.