إنسان نوعنده شو تخالف ايله برابر بغداى، اوزوم، آرى، قارينجه نوعلرنده‌كى توافق، كور تصادفڭ ايشى اولماديغى گونش گبى آشكاردر. مادام كه كثرتڭ بويله اوزاق، اينجه، گنيش أحوال و أطوارنده ده تصادفڭ مداخله‌سنه إمكان يوقدر. و تصادفڭ ألندن محفوظدر. و آنجق بر حكيمڭ قصدى و بر مختارڭ إختيارى و سميع بصير بر مريدڭ إراده‌سنڭ دائرهٔ تصرّفنده‌در.

"تصادف، شرك و طبيعت"دن تشكّل ايدن فساد شبكه‌سنڭ عالمِ إسلامدن نفى و إخراجنه، رسالهٔ نورجه ويريلن قرار إنفاذ ايديلمشدر.

إعلم أيّها العزيز!

شيطانڭ إلقا ايتمكده اولديغى وسوسه‌لردن برى:

"ياهو، شو قويون ويا اينك، أگر قدير و عليمِ أزلينڭ نقشى، ملكى اولمش اولسه ايدى· بو قدر مسكين بيچاره اولمازلردى. أگر باطنلرنده، ايچلرنده عليم، قدير، مريد بر صانعڭ قلمى چاليشمش اولسه ايدى، بو قدر جاهل، يتيم، مسكين اولمازلردى." ديين و جنّّى شيطانلره استاد اولان أى شيطانِ إنسى! جنابِ حق، هر شيئه لايقنى ويرييور و مصلحته گوره ويرييور. أگر عطاسى، إنعامى بو قاعده‌دن خارج اولسه ايدى، سنڭ أشگڭڭ قولاغى سندن و سنڭ استادلرڭدن داها عقللى، داها عالم اولماسى لازمدى. و سنڭ پارمغڭ ايچنده سنڭ شعور و إقتدارڭدن داها چوق بر شعور، بر إقتدار ياراتيردى. ديمك هر شيئڭ بر حدّى وار. او شى، او حدّ ايله مقيّددر.