ايشته بو سرّه بناءً آياتِ قرآنيه‌نڭ أهلِ تفسير طرفندن حدسز حقائقى بيان ايديلمش. مفسّرينڭ بيان ايتمديگى داها چوق حقائقى وار. و بِالخاصّه حروفاتنده و معناىِ صريحندن باشقه، إشاراتنده چوق علومِ مهمّه واردر.

ايكنجى نكته:

ايشته بو آيتِ كريمه

﴿مِنَ النَّبِيِّينَ وَ الصِّدِّيقِينَ وَ الشُّهَدَاءِ وَ الصَّالِحِينَ وَ حَسُنَ اُولٰئِكَ رَفِيقًا﴾

تعبيريله، صراطِ مستقيمڭ أهلى و حقيقى نعمِ إلٰهيه‌يه مظهر، نوعِ بشرده‌كى طائفهِٔ أنبيا و قافلهِٔ صدّيقين و جماعتِ شهدا و أصنافِ صالحين و أنواعِ تابعينڭ بولوندقلرينى إفاده ايتمكله برابر، عالمِ إسلاميتده او بش قسمڭ أڭ مكمّلنى دخى آيريجه صراحةً گوستردكدن صوڭره او بش قسمڭ إماملرى و باشده‌كى رؤسالرينى صفاتِ مشهوره‌لريله ذكر ايتمكله اونلره دلالت ايدوب إفاده ايتديگى گبى، إخبارِ غيب نوعندن بر لمعهِٔ إعجاز ايله او طائفه‌لرڭ إستقبالده‌كى رئيسلرينڭ وضعيتلرينى بر وجهله تعيين ايدييور. أوت

﴿مِنَ النَّبِيِّينَ﴾

ناصلكه صراحتله حضرتِ پيغمبر عليه الصلاة والسلامه باقييور.

﴿وَالصِّدِّيقِينَ﴾

فقره‌سيله أبو بكر الصدّيقه باقييور. هم پيغمبر عليه الصلاة والسلامدن صوڭره ايكنجى اولديغنه و أڭ أوّل يرينه گچه‌جگنه و "صدّيق" إسمى، اُمّتجه اوڭا عنوانِ مخصوص و صدّيقينلرڭ باشنده گورونه‌جگنه إشارت ايتديگى گبى·

﴿وَالشُّهَدَاءِ﴾

كلمه‌سيله حضرتِ عُمَر، حضرتِ عثمان، حضرتِ على رضوان اللّٰهِ عليهم أجمعينى اوچنى برابر إفاده ايدييور. هم اوچى صدّيقدن صوڭره نبوّتڭ خلافتنه مظهر اولاجقلرينى و اوچى ده شهيد اولاجقلرينى، فضيلتِ شهادتلرى ده سائر فضائللرينه علاوه ايديله‌جگنى إشارت و غيبى بر صورتده إفاده ايدييور.

﴿وَالصَّالِحِينَ﴾

كلمه‌سيله أصحابِ صفّه، بدر، رضوان گبى ممتاز ذواته إشارت ايده‌رك

﴿وَ حَسُنَ اُولٰئِكَ رَفِيقًا﴾

جمله‌سيله معناىِ صريحيله اونلرڭ إتّباعنه تشويق و تابعينلرده‌كى تبعيتى چوق مشرّف و گوزل گوسترمكله، معناىِ إشاريسيله خلفاءِ أربعه‌نڭ بشنجيسى اولارق و

﴿اِنَّ الْخِلَافَةَ بَعْدِى ثَلَاثُونَ سَنَةً﴾

حديثِ شريفڭ حكمنى تصديق ايتديرن مدّتِ خلافتى آزلغيله برابر قيمتنى عظيم گوسترمك ايچون او معناىِ إشاريسيله حضرتِ حسن رضى اللّٰه عنهى گوسترر.