برنجى نكته:

حضرتِ أيوب عليه السلامڭ ظاهرى ياره خسته‌لقلرينڭ مقابلى، بزم باطنى و روحى و قلبى خسته‌لقلريمز واردر. ايچ طيشه، طيش ايچه بر چوريلسه‌ك، حضرتِ أيوبدن داها زياده ياره‌لى و خسته‌لقلى گورونه‌جگز. چونكه ايشلديگمز هر بر گناه، قفامزه گيرن هر بر شبهه، قلب و روحمزه ياره‌لر آچار. حضرتِ أيوب عليه السلامڭ ياره‌لرى، قيصه‌جق حياتِ دنيويه‌سنى تهديد ايدييوردى. بزم معنوى ياره‌لريمز، پك اوزون اولان حياتِ أبديه‌مزى تهديد ايدييور. او مناجاتِ أيوبيه‌يه، او حضرتدن بيڭ دفعه داها زياده محتاجز. باخصوص ناصلكه او حضرتڭ ياره‌لرندن نشئت ايدن قوردلر، قلب و لساننه ايليشمشلر· اويله ده· بزلرى، گناهلردن گلن ياره‌لر و ياره‌لردن حاصل اولان وسوسه‌لر، شبهه‌لر (نَعُوذُ بِاللّٰه) محلِّ ايمان اولان باطنِ قلبه ايليشوب ايمانى زده‌لر و ايمانڭ ترجمانى اولان لسانڭ ذوقِ روحانيسنه ايليشوب ذكردن نفرتكارانه اوزاقلاشديره‌رق صوصديرييورلر.

أوت گناه قلبه ايشله‌يوب، سياهلانديره سياهلانديره تا نورِ ايمانى چيقارنجه‌يه قدر قاتيلاشديرييور. هر بر گناه ايچنده كفره گيده‌جك بر يول وار. او گناه إستغفار ايله چابوق إمحا ايديلمزسه، قورد دگل، بلكه كوچك بر معنوى ييلان اولارق قلبى ايصيرييور.

مثلا: اوتانديره‌جق بر گناهى گيزلى ايشله‌ين بر آدم، باشقه‌سنڭ إطّلاعندن چوق حجاب ايتديگى زمان، ملائكه و روحانياتڭ وجودى اوڭا چوق آغير گلييور. كوچك بر أماره ايله اونلرى إنكار ايتمك آرزو ايدييور.

هم مثلا: جهنّم عذابنى إنتاج ايدن بيوك بر گناهى ايشله‌ين بر آدم، جهنّمڭ تهديداتنى ايشيتدكجه إستغفار ايله اوڭا قارشى سپر آلمازسه، بتون روحيله جهنّمڭ عدمنى آرزو ايتديگندن، كوچك بر أماره و بر شبهه، جهنّمڭ إنكارينه جسارت ويرييور.

Yükleniyor...